Fɔntɔmfrɔm

Fɔntɔmfrɔm

drum

Subclass of	musical instrument
Country	Ghana
Located in the administrative territorial entity	Ashanti Region, Bono Region, Ahafo Region
Location	Bono Region
Creator	Bonofo
Made from material	wood, hide

Fɔntɔmfrɔm yɛ Akanfo ayer a wɔyan dze huhor ɔhen bi anaa okunyin bi. Ɔyɛ adehye kyen a wɔbɔ wɔ ber a biribi rebesi anaa ber a biribi esi, anaa ber a dwumason bi rokɔ do.

Abakɔsɛm

Tsetse no nna akyen a odzi akotsen nye; kete na asafo. Dɛm ber no nna kyen a ɔwɔ Esuantseman mu nye kete, na Denkyirafo na wɔdze bae wɔ ɔhen Boamponsem aber do wɔ afe 1692 mu. Dɛm ber no nna Esuantsefo hyɛ Denkyirafo ase.  Ntsi aber biara sɛ wɔrobɔ  kete kɛse no a, wɔbɔ no dɛ “kɔtɔkɔ bɔsom Amponsem, kɔtɔkɔ bɔsom Amponsem”. “Kɔtɔkɔ” no gyina hɔ ma Esuantseman na “Amponsem” no so gyina hɔ ma Denkyirafo.Sɛ wɔka dɛ “kɔtɔkɔ bɔsom Amponsem” a, nna wɔkyerɛ dɛ Esuantsefo bɔsoom Denkyirafo.

Afe 1701, ber a Osei Tutu I dzii Ntsim Gyakare no do nkonyim wɔ Effiduase ɔko kɛse no mu no ma n’ahendzi bɔbɔɔ adze no, nna ɔwɔ dɛ no so tum yɛ biribi kɛse a ɔbor kete do. Ɔnam iyi do ma no so dze kyen kɛse a wɔfrɛ fɔntɔmfrɔm bɔbɔɔ adze. Dza ɔyɛɛ ma fɔntɔmfrɔm bɛyɛɛ kɛse kyɛn kete nye dɛ, nna kete yɛ kyen ahorow enum, mbom fɔntɔmfrɔm bɛyɛɛ kyen ahorow esuon.  

Abakɔsɛm kyerɛ dɛ, Bɔrbɔr Mfantse fi akwantu mu reba no, wɔnndze fɔntɔmfrɔm bae. Mbom wɔdze asafo, aprede, adawuranan na Obendeeku na wɔdze bodur Mankessim ha. Nana Ɔson no wu ekyir no a Nana Eduonu Egyin bedzii adze no, nna otwar dɛ wonya biribi a wɔdze bɛgyegye ɔhen no taataa. Iyi maa wɔhyɛɛ ase dze bɔmbaa gyegyee ɔhen no taataa wɔ ber a ɔreba anaa ɔtse sor. Mber rokɔ enyim no, nna mpanyimfo hun dɛ otwar dɛ wɔhwehwɛ akyen ahorow binom ka ho ama woeetum ehuhor ɔhen no na wɔaka n’akɛseyɛ. Dɛm adwen na nyimdzee yi na ɔmaa wonyaa akyen bi tse dɛ etumpan, aprede, dawur, ansawa na frɔm a seseiara wɔdze gor fɔntɔmfrɔm no. Nna kyerɛ dɛ, dɛ mpanyimfo dze fɔntɔmfrɔm bohuhor ɔhen bi no nam bɔmbaa do bɔbɔɔ adze.

Akyen Ahorow A Wɔka Bɔmu Yɛ Fɔntɔmfrɔm

Dawur

Iyi yɛ edwindze a ɔtomfo abɔ a wɔdze dzi dwuma wɔ ayer ahorow pii mu. Asafo, bɔsoɛ, osuode, fɔntɔmfrɔm na pii a ɔkeka ho yɛ ayer ahorow a wɔgor a dawur ka ho bi. Fɔntɔmfrɔm mu no, wɔbɔ dawur dze ka dɛ “meka meka meka a, meka kyerɛ woara”.

Ansawa

Iyi yɛ kyen kakraba bi a wɔbɔ na ɔka akyen ahorow a wɔbɔ mu gor fɔntɔmfrɔm no ho. Sɛ wɔrogor fɔntɔmfrɔm a, kyen Ansawa ne nsɛm a ɔka nye dɛ“ aburafo wɔgor agor bɔn anaa bankye fufuw da gya mu”.

Opintsin

Iyi so yɛ kyen kakraba dɛ ansawa no. Mbom ɔyɛ tsia na no mu yɛ dur sen ansawa no. Dɛm kyen yi so wɔ nsɛm a ɔka ber a wɔrogor fɔntɔmfrɔm. Asɛm a opintsin no ka no nye dɛ“ Obirempɔn se obedzi ewu a, wɔmma mbusu nka no”. Dɛm kyen yi ka nsɛm yi mpɛn bɛyɛ ebiasa ana etumpan no ahyɛ ase akasa.

Etumpan

Etumpan yɛ akyen ebien, Onyin na Ɔber. Ɔber no si nyimfa na Onyin no si bankum. Wɔdze dɛm akyen ebien yi ka frɔm ebien, aprede ebien na dawur ho na wɔdze gor Mfantsefo ayer fɔntɔmfrɔm no. Wɔdze etumpan ka nsɛm pii kyerɛ ɔhen na ɔmamfo no. Wɔyan etumpan wɔ ber biara, dɛ ɔyɛ enyigyeber, awerɛhow, afahyɛber anaa ber a wɔregye ɔhen enyi. Ɔnam dɛ wɔdze kasa ntsi borɔfo kasa mu wɔfrɛ no “talking drum”. Fɔntɔmfrɔm no ngoree mu no, etumpan dzi kan tontom, kasa ana frɔm no agye do.

Frɔm

Frɔm iyi so yɛ akyen atsentsen ebien, kɛse kor na kakraba kor. Ɔkyerɛma bɔ akyen yi dze gyegye ahemfo taataa na wɔdze ka adɛfɛdɛfsɛm kyerɛ hɔn. Wɔbɔ kyen yi wɔ fɔntɔmfrɔm no ngoree mu ber a ɔhen bi rebɛtsena ase wɔ eguabɔ ase anaa oesi guamu dɛ ɔrebɛsaw. Dɛm akyen yi nye akyen a wodzi akotsen wɔ fɔntɔmfrɔm no ngoree mu. Nsɛm a akyen yi ka no bi nye:

“Nana brɛbrɛ,

to wo bo tsiatsia,

tutu w’anan ebirempɔnmu,

Woara w’asaase a,”

Ber a wotum gor fɔntɔmfrɔm

1. Ahemfo eyi ase: Sɛ ɔhen bi kɔ ekura a, wɔgor fɔntɔmfrɔm. Nkorɔfo binom so a wɔnnyɛ ahemfo mbom wɔka adehye ebusua no ho bi wɔ hɔ a wɔgor fɔntɔmfrɔm wɔ hɔn eyi ase. Dɛm nkorɔfo no bi nye, ebusuapanyin, Supi-mekyerɛ asafohemfo nyina hɔn panyin no, Safohen, Ɔbaahembaa na Ɔbaapanyin a ne ba afow egua pɛn anaa ɔbaapanyin a oeyi obi ma oedzi adze pɛn.

2. Wɔgor fɔntɔmfrɔm ber a ɔhempɔn bi rekɛgye awar. Wɔgor dze kyerɛ dɛ nyimpa kɛse anaa tsitsir bi reba hɔn nkyɛn.

3. Afahyɛ so a, wɔgor fɔntɔmfrɔm. Wɔgor no dɛm aber yi dze hyɛ ɔhen no enyimnyam na wohuhor no.

4.Bea ahemfo ahorow ehyia no wɔgor fɔntɔmfrɔm. Wɔgor no dɛm bea yi ma ahemfo ahorow no ada hɔn tumdzi edzi na wɔdze dzi hɔnho nkɔmbɔ so.

5. Ber a wɔrekyer ɔhen bi.

6. Ber a ɔhen roto n’egua do.

Frɔm Asaw Ahorow

Fɔntɔmfrɔm yɛ adze a yɛdze tontom na yɛdze huhor ahemfo no ntsi, yɛwɔ no ahorow pii. Yɛwɔ Atoperɛ, Mbaamu, Mbanyinmu, Ntutui na dza wɔdze ɔhen to sor a wɔbɔ ma no.

ATOPERƐ: Iyi yɛ fɔntɔmfrɔm bi a wɔbɔ dze ma ɔhen ber a oesi guamu rekyiakyia n’amamfo. Ɔnam dɛm ntsi wɔwɔ kwan soronko a wɔfa do bɔ fɔntɔmfrɔm no dɛm aber no.

MBAAMU: Iyi yɛ fɔntɔmfrɔm bi a wɔbɔ ber a ɔhen no esi gua do anaa asaw ewie. Wɔdze mbaamu yi to famu a, obiara tum saw bi ɔnam dɛ ɔhen no asaw ewie. Wɔbɔ mbaamu kyen dɛ kete. No mu nnyɛ hyew.

MBANYINMU: Iyi yɛ kasa a wɔbɔ dze soa ɔhen.

NTUTUI: Ntutui yɛ kyen kasa a wɔdze tutu anaa wɔdze nantsew kɔ guabɔ bi ase. Yɛkyerɛ ber a kyim si ahemfo do ma wɔrenantsew akɔ guabɔ ase. Wɔmmfa ntutui kyen nsaw.

DZA WƆDZE ƆHEN TO SOR A WƆBƆ: Iyi yɛ fɔntɔmfrɔm a wɔbɔ dze kyerɛ dɛ ɔhen no ridzi bam. Wɔbɔ iyi dze kyerɛ dɛ wɔrema ɔman no nyina ehu dɛ ɔhen nye iyi anaa hɔn hen na wɔama no do no.

Iyi da nkyɛn a, yɛwɔ ɔhen biara na fɔntɔmfrɔm a wɔbɔ ma no. Ɔnam dɛ ɔhen bi dzi bi ekyir ntsi, ɔdzekuroɛ wɔ dza wɔbɔ ma no na no mu nsɛm a wɔka. Dɛmara so na ɔmanhen so wɔ fɔntɔmfrɔm na no mu nsɛm a wɔka dze tontom anaa huhor no. Wɔmmbɔ ɔmanhen no fɔntɔmfrɔm mma ɔdzekurow. Ɔba no dɛm a, nna ɔkyerɛ dɛ, ɔdzekurow no ammfa enyidzi amma ɔmanhen no.

Frɔm mu mbra

1.    Wɔnnhyɛ mpaboa nnsaw anaa nngor gyedɛ ahemfo pɛr.

2.    Wɔmmbɔ ɔmanhen no fɔntɔmfrɔm mma ɔdzekurow.

3.    Nkaa no na adehye nko na wɔbɔ frɔm.

4.    Ɔdzekurow nntum nnsaw Ɔmanhen n’asaw.

Mboae mbea ahorow

PC: Nana Ahimful, ɔkyerɛma a ɔwɔ Essiam

PC: Ɔpanyin Kɔbena Yanko,ɔkyerɛma a ɔwɔ Mankessim.