Abɛntsia

Abɛntsia yɛ abɛn a mpanyimfo nyim fir tsetse, na n'atsetse dzin nye "Afrɛfrɛbɛn," tserɛ ɔyɛ abɛn a wɔdze bɔ ɔhen bi n'abɔdzin na ne nsabran dze tonton no.

Krampa, D.E.K. (1997ɔ na Agyakum, Kofi (2000ɔ. Kyerɛ abɛntsia ase dɛ abɛn bi a ɔsom ahemfo bo yie. Sɛ wɔreyɛ dɛm abɛntsia no a, son n'ambɛn no, wɔtɔ hɔn bo twa n'ano feaa no kyen na woetue mu wɔ ne nkyɛmfamu. Abɛntsia ho ntokur no yɛ ebiasa; ambɛn no tsir, ano feafea a wotwae no na nkyɛnmu a wotuei no. Wɔdze sekan siesie ambɛn no mu ma ɔyɛ trontrom. Sɛ woennsiesie mu yie a, biew tum fi mu. Abɛntsia ka ahemfo hɔn ngua ho nsokwadze ho ntsi nnyɛ ɔpanyin biara na ɔwɔ abɛntsia. Ɔhen biara so wɔ kwan soronko bi a wɔfa do hɛn n'abɛntsia. Mbɛntsia ka nsɛm dɛ mbrɛ akyen ka yi ara; no mu tsew nwam na krɔnkrɔn mpo kyɛn akyen bi hɔn kasaa.

Mbɛntsia Mfatoho

Dɛ mbrɛ yeedzi kan aka no, Mfantseman mu no, ɔhen biara ɔsor kwan a wɔhɛn n'abɛntsia. Ɔno ntsi na mpanyimfo bu bɛ dɛ, "Sɛ wo werɛ fir wo kurow mu hen n'abentsia ndze a, eyew wɔ eguabɔ ase."

Mfantseman mu ahemfo mu bi hɔn mbɛntsiahɛn na kasa a wɔka wɔ mu na odzidzi do yi:

Nana Apa Kusi a ɔwɔ Edwumako Ɔkyeso wɔhɛn n'abɛntsia dɛ:

Pantampran pantampran!

Ibotum son yi men?

(Pantampram nye abowa nyin kɛse koraa a ɔwɔ hɔ.ɔ

Ekumfi Ɔmanhen ,Nana Akyen n'abɛntsia wɔhɛn no dɛ;

Suro kɔkɔ!

Esuantse suro Akyen kɔkɔ.

Nana Hama a ɔyɛ Edwumko Ɔmankrado wɔ Apa afamu no, n'abɛn a wɔhɛn nye dɛ;

Esuantse kɔtɔkɔ!

Hom botum eku m'?

Esuantse kɔtɔkɔ!

Hom botum eku m'?

Esuantse kɔtɔkɔ!

Hom mbedzi duadze!

Edwumako Ɔnwane Anɔna ebusua hɔn abɛntsia wɔhɛn no dɛ:

Ɔtan dodow yi nye dɛn?

Ɔwo reyɛ iyi?

Ɔtamfo a ɔreyɛ me e,

Mehu wo o!

Gomoa Otsepirew Nana Osompa II, Wɔhɛn n'abɛn dɛ;

Ɔkatakyi Buabeng

Ɔtamfo

Ma mo ho ndwe me.

Mbɛntsia Ho Mfaso

1. Mbɛn kasa ka tsetsesɛm

2. Ɔda hɛn amambra edzi

3. Ɔyɛ kasa bi a wɔdze tu fo

4. Yɛdze kyereɛ hɛn abɔse

5. Yɛdze kyerɛ mbabun abakɔsɛm

6. Wɔdze mbɛn ka asɛm a, no mu yɛ dur a sɛ obi dze n'ano ka a obenya asɛm kɛse

7. Ɔda etsitsir bi tse dɛ ahemfo hɔn akokodur edzi.

8. Wɔdze mbɛn bɔ obi n'abɔdzin

Mboaedze

Agyekum, Kofi (2000ɔ. Aspect of Akan Oral Literature in Media;Research Review Vol. 16(2ɔ: 1- 18 Institute of African Studies Legon.

Krampa, D. E. K. (1997ɔ Mfantse Kodzisɛm ho Adzesua. Accra:Bureau of Ghana Languages