Dwumadzinyi:Miss Black Canadian

Ewuraba Efua Daaba Esaah yɛ me dzin mbom dodowara frɛ me Miss Noble, binom so frɛ me Black Canadian.

Wɔwoo me afe 1998, Kwakwar bosoom no ne da a otsia eduonu esuon.

M'egya na me nã yɛ Owura Daniel Justice Duah na Owurayer Aba Seguwa a hɔn nyinara tse Gomoa Mpota a ɔwɔ Simpa.

Minyaa m'ahyɛse skuul ntsetsee wɔ Mpota D/A Basic Skuul. Mudur mangow ebiasa no, m'egya yii me kɔr Pentecost International Skuul a ɔwɔ Ansaful-Simpa a ndɛ wɔfrɛ no Pentecost Preparatory Skuul. Hɔ na muwiee mo Junior High School.

Afe 2013 mu no, motoaa do kɔr Potsin T.I Ahmadiyya Nsɔwdo Skuul a ɔwɔ Potsin kɛyɛɛ General Arts na miwiee afe 2016 mu.

Muwiee Nsɔwdo Skuul no, menye 'Electricity Company of Ghana' panyin kor kɛyɛɛ edwuma kakra ansaana mirigyaa akɔ Kasoa akɛyɛ edwuma fofor. Enndu bosoom kor mpo na migyaa edwuma no osiandɛ nna m'ahoɔden nnkotum ayɛ.

Mesanee baa Simpa bɔtɔɔn indomie. Osiandɛ nna kurow no suar na no dɔm no nnhyɛ da nnye m'egya nnyɛ adze ntsi, nna adzetɔn no ayɛ dzen kakra.

Afe 2018 mu no, mekɛyɛɛ 'Teaching Assistant' wɔ Mpota D/A Model Skuul kakra.

Afe 2019 mu no, mekɛyɛɛ Mfantse kyerɛkyerɛnyi wɔ Pentecost Preparatory Skuul.

Minyaa mo suapɔn mu ntsetsee wɔ University of Education, Winneba hɔn nkorbata a ɔwɔ Ajumako kenyaa me B.A Fante with English Education.

Medze moho kɔbɔɔ Fante Wikimedians Kuw no ho ama meetum aboa etu me kasaa mpɔn.

Meyɛ Model so.